Сот Курманбек Бакиевдин бир тууганына байланыштуу өкүмдү жокко чыгарды | Эркиндик Медиа

Сот Курманбек Бакиевдин бир тууганына байланыштуу өкүмдү жокко чыгарды

Кечээ, 11-майда Жогорку Сот мурдагы президент Курманбек Бакиевдин бир тууганы Каныбек Бакиевге карата чыгарылган өкүмдү жокко чыгарган. Бүгүн, 12-майда Жогорку Соттун басма сөз кызматы төмөнкүлөрдү билдирди.

“27-апрелде Жогорку Сот тарабынан буга чейин Бакиевге карата чыккан Жалал-Абад шаардык жана облустук соттун өкүмү жокко чыгарылган. Кылмыш иши толук иликтенбегенине байланыштуу кайра кароого жиберилди. Ал эми жактоочунун Каныбек Бакиевди толугу менен актоо боюнча келтирген өтүнүчү канааттандырылган эмес.

Каныбек Салиевич Бакиев катышкан кылмыш иши тууралуу соттордун чечими боюнча келип чыккан суроолорду эске алуу менен, Кыргыз Республикасынын Жогорку Соту биринчи жана экинчи инстанциядагы соттор тарабынан бир катар мыйзам бузууларга жол берилгендигине байланыштуу ишти жаңыдан кароого жөнөткөн. Иш боюнча күбөлөрдүн көрсөтмөлөрүнө тийиштүү баа берилген эмес.

Азыркы Кыргыз Республикасынын Жазык процессуалдык кодексинде актоонун негизги күнөөсү далилденбегендиктен актоо каралбагандыгына карабастан соттор өкүмдүн актоо бөлүгүн кабыл алууда. Кыргыз Республикасынын 340-беренесинин талаптарын бузуу менен, жогоруда көрсөтүлгөн негиз менен акташкан.

Жогорку Сотунун жазык иштери жана жоруктар жөнүндө иштер боюнча соттук коллегиясынын 2021-жылдын 21-апрелиндеги токтому менен прокурордун кассациялык сунушу канааттандырылып, ал эми Каныбек Бакиевди актоо тууралуу жактоочунун даттануусу канааттандыруусуз калтырылган”, – деп жазылат маалыматта.